ኤርትራ – በዓል ጥምቀት – ኣብ መላእ ሃገር ብክብ ዝበለ ማዕርግ ተኸቢሩ

ኤርትራ – በዓል ጥምቀት፡ ትማሊ ፲፱(19) ጥሪ ኣብ መላእ ሃገር ብክብ ዝበለ ማዕርግ ተኸቢሩ። ኣብ ከተማ ኣስመራ ኣብ ዝተኻየደ ብኣሽሓት ዝቚጸሩ መእመናን ኣብ ዝተሳተፍዎ ስነ-ስርዓት፡ ኣብ ቅድሚ’ቶም ብድሮ ካብ ኩለን ኣብያተ-ክርስትያን ብመእመናን ተሰንዮም ኣብ ባሕረ- ጥምቀት ዝሓደሩ ታቦታት፡ ብወከልቲ መዘምራን በዓል ተራ ደብሪን ሕብረት ውሉደ-ክህነትን ሰበኻ ተኻይዱ።

ብመሪሕነት ዋና ጸሓፊ ቅዱስ ሲኖዶስ ብጹእ ኣቡነ ሉቃስ ድማ ቡራኬን ኣስተምህሮን ተዋሂቡ። ብድሕሪ’ዚ፡ ብመሪሕነት ብጹእ ኣቡነ ሉቃስን ሊቃውንትን ኣብ ዙርያ ባሕረ-ጥምቀት ቅዳሴን ጸሎተ ወንጌልን ዓሪጉ።

ኣብ’ቲ በዓል፡ መምህር ኤልያስ ሃብታይ ንታሪኻዊ ኣመጻጽኣ በዓል ጥምቀት ዝምልከት ስብከት ኣስሚዖም። ብመሪሕነት ብጹእ ኣቡነ ሉቃስ፡ ብጹኣን ጳጳሳትን ሊቃውንትን ባሕረ- ጥምቀት ተባሪኹ ናብ ህዝቢ ምስ ተነጽገ ድማ፡ ካህናት ነቲ በዓል ዝምልከት ዜማ እናስምዑ ኣስረጊጾም።

ኣብ መወዳእታ፡ ቡራኬ ምስ ተዋህበ፡ ታቦታት ብምእመናን ተሰንዮም ነናብ ኣድባራቶም ተመሊሶም።

ኣብ’ቲ ስነ-ስርዓት፡ ንኣመሓዳሪ ዞባ ማእከል ብምውካል – ዋና ዳይረክተር ምምሕዳርን ፋይናንስን ምምሕዳር ዞባ ማእከል ኣቶ ብርሃነ ነጋሽን ካልኦት ላዕለዎት ሰበ-ስልጣን መንግስትን ዕዱማት ኣጋይሽን ተሳቲፎም ነይሮም።

ኣብ ኩለን ዞባታት እውን ብተመሳሳሊ፡ ብክብ ዝበለ ስነ-ስርዓት ከም ዝበዓለ ወኪላት ኤሪና ሓቢሮም።

Source: shabait.com

Leave a Reply

Your email address will not be published. Required fields are marked *

By continuing to use the site, you agree to the use of cookies. more information

The cookie settings on this website are set to "allow cookies" to give you the best browsing experience possible. If you continue to use this website without changing your cookie settings or you click "Accept" below then you are consenting to this.

Close